कांग्रेसका वरिष्ठ नेता पौडेलको जित सुनिश्चितः अध्यक्ष नेपाल

रेडियो गौशाला , ५७०  पटक हेरिएको

धनुषा- पूर्वप्रधानमन्त्री एवं नेकपा (एकीकृत समाजवादी) पार्टीका अध्यक्ष माधवकुमार नेपालले नयाँ राजनीतिक अवस्था सिर्जना भएसँगै देश तथा पार्टीका लागि थप चुनौती बढेको बताउनुभएको छ ।

धनुषाको लालगढमा आयोजना गरिएको प्रदेशस्तरीय प्रशिक्षण कार्यक्रममा उहाँले चुनौतीको सामना गर्नका लागि पार्टी एक ढिक्का भएर अगाडि बढिसकेको बताउनुभयो ।

आठ दलको समर्थनसहित राष्ट्रपति पदका लागि उम्मेदवार बन्नुभएका नेपाली कांग्रेसका वरिष्ठ नेता रामचन्द्र पौडेलको जित सुनिश्चित भएको बताउनुभयो ।

अध्यक्ष नेपालले नयाँ अवस्था सिर्जना भएर आठ दलको समर्थन कांग्रेसका उम्मेदवारको पक्षमा भएकाले राष्ट्रपति पदमा अपेक्षित परिणाम आउन लागेको जानकारी गराउनुभयो ।

स्थानीय, प्रदेश तथा सङ्घीय चुनाव हुनुभन्दा केही समय अगाडि मात्र पार्टीको निर्माण भएकाले अपेक्षाअनुसार परिणाम नआएको बताउँदै उहाँले एकमहिने पार्टी सुदृढीकरणले पार्टीको सङ्गठन सुधार र मजबुत हुने जानकारी गराउनुभयो ।

अध्यक्ष नेपालले वडादेखि जिल्ला हुँदै प्रदेश समितिलाई पनि मजबुत बनाउन अभियानले मद्दत पुग्ने भएकाले कार्यकर्तालाई सङ्गठन निर्माणमा जुट्नका लागि निर्देशन दिनुभयो ।

प्रकाशित मिति: २०२३-०२-२७ , समय : ११:५०:५८ , १ वर्ष अगाडि